{ رقيت من عصري }

رقيت من عصري على راس تلّه                مبعد عن إزعـاج المـلا والمدينـه

جـيـت ابمـكـانٍ صــاد مـحـدٍ يـدلّـه         والنفس تهوى اللي يحـرّك حنينـه

يغرينـي البـوح الشهـي واستحلّـه         فلّيت ضوضـاي وطويـت السكينـه

يا حبْـر سجّـل وأحفظـي يـا مجلّـه         و يـا قـاف غـرّد للعيـون الحزينـه

شـعـري يباريـنـي ســواة الأظـلّـة         نمشـي سـوا دايـم وعينـي بعيـنـه

واقـول يـا عـلّ الحـروف ابمحـلّـه         وأنقش مـن المعنـى فرايـد ثمينـه

الـزود مـا فـوق المواجـيـب كـلّـه         و من قام بالواجـب تبيّـض جبينـه

لا شـكّ مـا يبـري جـروح المـذلّـه         يـا كـود زودٍ مـا خلـط مــاه طيـنـه

الـعـقْـل أرضٍ والمـواقـيـف فـلّــه         خطّـط وعـمّـر والتـجـارب معيـنـه

درس الزمن بستان والوقت سلّه         أغنم مـن أعنابـه وخوخـه وتينـه

منجـوم مـن ضيّـع وقـوت الأهلّـه         تمضي سنينه ما درى وش سنينه

و من تاه في نصّ البحر واستدلّه         يرجع على الميناء يقود السفينـه

و زبـــدة القـيـفـان دقــــة وجــلّــه         بـا قولـهـا واقـطـع بشـكّـي يقيـنـه

عايـش وشايـف زود خلّـه وعـلّـه         و يامـا فريـت احبـال فـكـرٍ متيـنـه

حنّـا بجيـلٍ عجْـل مـحـدٍ فـطـن لّــه         فيه البطى محبوس مثـل الرهينـه

أمـا كتبـت الحـلـم كـتـب السجـلّـه         والا مـن الـواقـع تــذوق الغبيـنـه